ပစ်စလတ်ခတ် ကောင်းကင်

အနူးညံ့ဆုံးလို့ ရည်စူးခဲ့တယ်
အချစ်တတ်ဆုံးလို့ ဟစ်ကြူးခဲ့တယ်
တကယ်ဆို...
အဖြစ်တွေ မထူးခင်ရူးသွားနိုင်တဲ့အနေအထားတွေနဲ့
အခုဘ၀က ရှေ့သွားနောက်လိုက်မညီတော့ဘူး ။ ။

အနာဂတ်ကို မှန်းမျှော်ကြည့်တော့
ပိန်းပိတ်အောင် မှောင်တဲ့ညတွေမှာ
ဘ၀ကံကြမ္မာတွေ ခါးသက်လွန်းတာများ
အတိတ်ချိုချိုတွေတောင် ဆေးဘက်မ၀င်တော့ ။ ။

ငါ့သက်ပြင်းနဲ့ပဲ ငါ့ခန္ဓာကိုထွန်းလင်းစေလိုက်တယ်
တိုးတိတ်လွန်းစွာရှိုက်ငင်နေတဲ့ အရိုးအဆစ်တွေရဲ့ညဉ်းသံနဲ့
ဘယ်လိုစည်းချက်မျိုးမှ ကာရန်မတိုးတော့တဲ့အခါ
နေဆယ်စင်းရဲ့ အပူမျိုးတွေကိုပဲ
တစ်ယုတစ်ယပိုက်ထွေးရင်း
အမှတ်တရတွေထဲမှာပဲ တခုတ်တရရူးသွပ်နေပေါ့ ။ ။

ဝါးအနုလေးတွေစုနေတာ မြှစ်ဖြစ်ခဲ့သလို
သနားအမှုလေးတွေစုနေတာ အချစ်ဖြစ်ခဲ့ရင်
လောကပါလရေ...
ဘယ်လိုသနားမှု တံစိုးလက်ဆောင်မှမပေးနဲ့

ငါ့ရင်ခွင်ရွက်တိုင်ထိပ်မှာ အကြင်နာတံဆိပ်ကပ်နှိပ်ခွင့်မရှိတော့လို့ ။ ။

ဘ၀ဆိုတာ နေတတ်ရင်ကျေနပ်စရာချည်းပါတဲ့
အချိန်တော်တော်ကြာကြာတည်းက ကြားဖူးခဲ့တယ်
ဖြစ်ချင်တာထက် ဖြစ်သင့်တာတွေကိုလိုက်လျောလွန်းနေရတော့
နစ်မြုပ်မှန်းမသိနစ်မြုပ် ယိုင်နဲ့မှန်းမသိယိုင်နဲ့ရင်း
ကန့်လန့်ဖြတ်မျောတဲ့ အနာဂတ်ခရီးကြောမှာ
ဝေဒနာသာ အောင်ပွဲခံလို့ပေါ့ ။ ။

ပေးခဲ့ဖူးတဲ့ ကတိစကားတွေနဲ့
ထားခဲ့ဖူးတဲ့ သစ္စာတရားတွေဟာ
စတေးပစ်ခံလိုက်ရတဲ့ နှလုံးမိုက်ရင်မှာ
ဖွတ်တစ်ကောင်လောက်တောင်မှ တောက်ပမှုကင်းမဲ့သွားတဲ့အခါ
ဒဏ်ရာတွေကိုပဲ နေ့ရက်လိုခင်းနင်းရင်း
ရင်တွင်းအပူရုပ်ကို ဟန်ဆောင်သိမ်းထုပ်
ခန္ဓာမီးငြိမ်းလို့ အာရုံတွေမတိမ်းခင်
စိတ်စေရာဟင်းလင်းပြင်ထဲ ဗလာစိတ်တွေနဲ့မျောဦးမယ်
ရင်နင့်ခြင်းရာသီမှာ
ပစ်စလတ်ခတ် ကောင်းကင်ဟာလည်း
ဘာရာဇ၀င်မှ မရေးချင်တော့ဘူး ။ ။


စိတ်၏စေရာနာခံလေသော
မိုးမြင့်တိမ်